Skjaldborgarhátíðin, hátíð íslenskra heimildamynda, er vel sótt þetta árið. Hún er haldin á Patreksfirði og stendur yfir dagana 17. til 20. maí.

Fjöldi mynda eru til sýnis ásamt verkum sem eru í vinnslu. Heiðursgestir þetta árið eru Joe Bini og Maya Daisy Hawke. Sýna þau tvær myndir.

Í ár hleypir Skjaldborg af stokkunum verðlaunum fyrir heimildastuttmynd ársins en verðlaunagripurinn hefur hlotið nafnið Skjaldan.

Nýju verðlaununum fylgir gjafabréf frá tækjaleigunni Kukl að verðmæti 250 þúsund og háhraða vinnsludiskur frá Sensor Films, umboðsaðila fyrir Glyph-vinnsludiska á Íslandi.

Ragna Ragnarsdóttir hannaði þennan dýrmæta grip en hann er búinn til úr þurrkuðum blómum og epoxy resin.

Í kvöld verður boðið upp á fiskiveislu á Skútanum. Þá verður einnig áhorfendakosning, verðlaunaafhending og ýmislegt fleira.