Margir telja að átt hafi verið við nýjustu myndina af dönsku konungshjónunum sem á meðal annars að vera notuð í öllum sendiráðum Danmerkur.

Þykir þetta áhugavert í ljósi þess hversu mikla gagnrýni breska höllin fékk þegar hún sendi út verulega breytta mynd af Katrínu prinsessu og börnunum í tilefni af mæðradeginum. 

Margir segja að myndin af Friðriki kóngi og Mary drottningu sé samsett. Teknar hafi verið myndir af þeim í sitthvoru lagi og þær myndir svo settar saman.

Danska konungshöllin neitar hins vegar öllum ásökunum. „Ekki hefur verið átt við hina opinberu gala-portrett mynd,“ er haft eftir höllinni í Daily Mail.

Þetta er ekki í fyrsta sinn sem danska höllin er sökuð um að eiga við myndirnar sem frá þeim koma. Í janúar síðastliðnum voru uppi svipaðar vangaveltur um afmælismynd af tvíburunum Vincent prins og Jósefínu prinsessu. Þá voru þau nákvæmlega eins uppstillt og á hópmynd sem var tekin sama dag. Margir töldu víst að þau hefðu verið klippt saman á mynd í tilefni af afmælinu.