Óli Páll snýr aftur til Snjallgagna

Dr. Óli Páll Geirsson hefur verið ráðinn framkvæmdastjóri gagnavísindateymis hugbúnaðarfyrirtækisins Snjallgagna. Óli Páll hefur samhliða snúið til baka í eigendateymi félagsins, en hann var einn af stofnendum þess árið 2020.

Í tilkynningu frá félaginu kemur fram að Snjallgögn þrói hugbúnaðarlausnir sem gera fyrirtækjum mögulegt að hagnýta gervigreind og gagnavísindi en lykilvara fyrirtækisins er gervigreindarkerfið Context Suite, en fyrirtækið hefur allt frá stofnun unnið að margvíslegum gervigreindarlausnum.

Óli Páll leiddi síðast gagnavísindateymi Lucinity, sem hafði það hlutverk að þróa gervigreindarlíkön og aðferðir sem auðvelda fjármálafyrirtækjum til að taka gagnadrifnar og árangursríkar ákvarðanir í baráttunni gegn peningaþvætti. Hann starfaði áður sem gagnastjóri Reykjavíkurborgar á þjónustu- og nýsköpunarsviði. Þar áður var Óli Páll sérfræðingur í gagnavísindum hjá Landsbankanum. Hann er með doktorsgráðu í tölfræði frá Háskóla Íslands og B.Sc. gráðu í stærðfræði frá sama skóla. Samhliða fyrri störfum hefur Óli Páll starfað sem aðjúnkt í tölfræði við Háskóla Íslands.

Viðskiptavinir Snjallgagna starfa á ólíkum sviðum atvinnulífsins og eru meðal annars Arctic Adventures, Bónus, Íslandshótel, Nova, Rarik og Sýn.

• Blogga um frétt