Deiluaðilar boðuðu Þorgerði á fundinn

Þorgerður Katrín Gunnarsdóttir sjáv­ar­út­vegs­ráðherra segist ekki vita hvar eða hvenær fundur hennar með deiluaðilum í sjómannadeilunni verður haldinn í kvöld. Samninganefndir sjómanna og Samtaka fyrirtækja í sjávarútvegi hafa fundað hjá ríkissáttasemjara í dag.

„Ég hef sagt allan tímann að það er sjálfsagt mál að ræða og hlusta á hvað menn hafa fram að færa,“ segir Þorgerður Katrín í samtali við mbl.is.

„Þetta er deila á milli sjómanna og útgerðarmanna, ekki deila ríkisins við þá og það er ekki hægt að koma með einhverjar kröfur sem stilla ríkinu upp við vegg,“ bætir Þorgerður við en hún segir engar sérstækar aðgerðir í kortunum, eitt skuli yfir alla ganga.

Aðspurð segir Þorgerður að fyrirhugaður fundur í kvöld sé að frumkvæði deiluaðila. „Þetta er að þeirra frumkvæði sem er ákveðin vísbending um að þeir eru komnir eitthvað áleiðis í samningaviðræðunum.“

Þorgerður ákvað í gær á grund­velli til­lagna Haf­rann­sókna­stofn­un­ar að auka heild­arafla ís­lenskra skipa á loðnu í alls 196.075 tonn á þess­ari vertíð. Áætlað heild­ar­verðmæti loðnu­afl­ans er um 17 millj­arðar króna. Fyrr í vet­ur hafði ís­lensk­um skip­um verið út­hlutað rúm­um 12 þúsund tonn­um þannig að aukn­ing­in er rúm­lega sex­tán­föld.

„Ég held að menn átti sig á ábyrgðinni þegar svona mikil verðmæti eru í hafinu. Menn hafa ekkert mjög langan tíma til að ná í loðnuna, í mesta lagi þrjár, fjórar vikur þannig að það hefur örugglega sett ákveðna pressu á þá. Þetta eru tæpir 17 milljarðar fyrir þjóðarbúið og það er alvarlegt ef menn ná ekki að klára það til að ná í loðnuna,“ segir Þorgerður þegar hún er spurð hvort sú ákvörðun hafi sett aukna pressu á samninganefndirnar.

• Blogga um frétt