Fullfermi eftir hrygningarstopp

Vestmannaey VE og Bergey VE héldu til veiða á föstudagsmorguninn að loknu hrygningarstoppi og hófst veiðin strax af krafti að því er segir á vefsíðu Síldarvinnslunnar. Voru bæði skip komin til löndunar í Vestmannaeyjum daginn eftir með nánast fullfermi. Skipin lönduðu síðan fullfermi aftur í morgun og var uppistaða aflans ýsa og þorskur.

Léleg aflabrögð hafa hins vegar verið hjá togurunum á Austfjarðamiðum að undanförnu og hafa austfirsku togarnir því leitað á fjarlægari mið.

„Gullver NS hefur verið að veiðum fyrir sunnan land og er nú á leið til Seyðisfjarðar með fullfermi. Barði NK hefur verið á Vestfjarðamiðum og landaði fullfermi á Dalvík í gærkvöldi. Uppistaða afla Barða var þorskur og ufsi. Blængur NK hefur að undanförnu veitt ufsa á Halamiðum og hafa aflabrögðin verið góð,“ segir enn fremur.

• Blogga um frétt