„Ævintýralegt fiskirí“

„Það hefur verið ævintýralegt fiskirí síðustu daga,“ sagði Andrés Þ. Sigurðsson hjá Vestmannaeyjahöfn í gærkvöldi. Páskastoppi eða banni vegna hrygningar þorsks lauk fyrir Suður- og Vesturlandi á föstudag.

Eyjabátar þurfa ekki að sækja langt og virðist vera fiskur allt í kringum Eyjar, aðeins misjafnt eftir því hvaða tegund menn sækjast eftir og hvernig aflaheimildir standa.

„Togbátarnir hafa yfirleitt verið úti í um sólarhring og þá komið inn með fínan afla, þannig að þeir landa oft í viku. Það hefur líka verið fínt á netunum og menn tala um að þeir hafi ekki séð annað eins af þorski,“ segir Andrés í umfjöllun um mokfiskeríið fyrir Suðurlandi í Morgunblaðinu í dag.