Þorgerður Katrín Gunnarsdóttir sjávarútvegsráðherra tilkynnti í dag um stofnun nýs markaðsfyrirtækis á sviði skipalausna, Knarr Maritime, á alþjóðlegu sjávarútvegssýningunni, sem nú stendur sem hæst í Brussel. Að hinu nýja  fyrirtæki standa íslensku fyrirtækin Skaginn 3X, Nautic ehf. , Kælismiðjan Frost ehf., Brimrún ehf., Naust Marine ehf., og Verkfræðistofan Skipatækni ehf. sem öll hafa á undanförnum árum komið að hönnun, þróun, smíði og sölu á búnaði og skipum til veiða og vinnslu á sjávarfangi.

Þetta kemur fram í fréttatilkynningu.

Þar er vitnað í Þorgerði sem segir það afar ánægjulegt að hafa komið að því að ýta þessu verkefni úr vör. Hún segir hugvit og frumkvæði íslenskra hátæknifyrirtæki hafa skipað þeim og sjávarútvegi okkar í fremstu röð og það skref sem stigið var í dag staðfesti það frumkvæði og forystu.

Þrátt fyrir að fyrirtækin sex hafi í dag stofnað sameiginlegt markaðsfyrirtæki hafa þau átt í talsverðu samstarfi á undanförnum árum og má þar nefna samstarf við hönnun, smíði og uppsetningu vinnslustöðva innanlands og utan auk þess sem þau taka flest svipaðan þátt í smíði þeirra skuttogara sem hafa verið og eru nú í smíðum fyrir íslensk sjávarútvegfyrirtæki. Starfsemi Knarr Maritime byggir því í raun á áratuga reynslu og þekkingu.

„Íslenskur sjávarútvegur og iðnaður hafa ávallt verið í fararbroddi hvað þekkingu og tækni varðar og samstarf þessara fyrirtækja getur styrkt þá stöðu enn frekar,“ er haft eftir Finnboga Jónssyni, sem er stjórnarformaður hins nýja fyrirtækis. 

Fyrirtækin sem að Knarr Maritime standa munu hvert um sig koma að hönnun og smíði á afmörkuðum þáttum sem ýmist verða smíðaðir af fyrirtækjunum sjálfum eða undirverktökum þeirra. Smíði aðalvéla og skipsskrokksins sjálfs verður síðan ákveðin í nánu samstarfi við kaupendur skipanna hverju sinni. Þannig verður hægt að bjóða fiskiskip af ýmsum stærðum og gerðum allt eftir óskum hvers kaupanda fyrir sig. „Viðskiptavinir okkar geta á einum stað nálgast allt það besta við fiskveiðar sem íslendingar hafa fram að færa hvort heldur vinnslan fer fram um borð í veiðiskipi eða í landi,“ er haft eftir Haraldi Árnasyni, nýráðnum framkvæmdastjóra Knarr Maritime, en hann hefur um áratugaskeið stjórnað ýmsum fyrirtækjum Hampiðjunnar víðs vegar um heim.

Tengdar fréttir

Nýsköpun og tækni í sjávarútvegi

Hugmyndafræði Sjávarklasans víða eftirsótt

• Rétt hugarfar hafi átt áhrif á heimsvísu
• Árangur Íslands skólabókardæmi um fullnýtingu
• Vinnslur gætu framleitt eigin sótthreinsiefni úr sjó
• Sjávarútvegurinn er drifinn áfram af gögnum

» Fleiri tengdar fréttir

• Blogga um frétt