Léleg grásleppuvertíð

Það sem af er vertíð eru komin á land 1.629 tonn af grásleppu, segir á vef Fiskistofu.  Þetta er verulega minni afli en á sama tíma á síðustu vertíð en þá hafði 3.219 tonnum verið landað.

Grásleppuaflinn er því tæplega helmingi minni á þessari vertíð miðað við vertíðina í fyrra. Alls hafa útgerðarmenn 157 báta sótt um leyfi til veiða á yfirstandandi vertíð. Fjöldi útgefinna leyfa er æði misjafn milli svæða. Flest eru leyfin, 77 alls, fyrir svæði E sem nær frá Skagatá að Fonti á Langanesi.

Það sem af er vertíð er Finni NS-21 aflahæstur grásleppubáta með 39,2 tonn en hann er gerður út á svæði F sem er NA-land. Næstur í röðinni er Glettingur NS-100 með 34,2 tonn.

• Blogga um frétt