Selja verksmiðju í hollenskt skip

Skaginn 3X hefur komist að samkomulagi um smíði á uppsjávarverksmiðju um borð í hollenskt verksmiðjuskip. Um er að ræða frekari þróun á þeim búnaði og tækni sem fyrirtækið hefur þróað og selt til nokkurra staða í landvinnslur á undanförnum árum, síðast til Eskju á Eskifirði.

Fyrr í þessum mánuði var gengið frá samningi milli útgerðarfyrirtækisins France Pelagique og norsku skipasmíðastöðvarinnar Havyard um smíði fullkomins uppsjávarverksmiðjuskips til frystingar. Skipið er 80 metrar að lengd og tæpir 18 metrar að breidd. Gert er ráð fyrir að smíði skipsins ljúki í árslok 2018.

Havyard og Skaginn 3X hafa nú komist að samkomulagi um að verksmiðjubúnaður skipsins verði hannaður og settur upp af Skaganum 3X.

Í tilkynningu er haft eftir Jóni Birgi Gunnarssyni, markaðs- og sölustjóra Skagans 3X, að verksmiðjan sé mjög tæknivædd. Meðal annars verði notast við myndgreiningartækni sem greinir hvern einasta fisk eftir tegund, stærð og gæðum og gefi möguleika á rekjanleika í gegnum vinnsluferlið. Hjartað í vinnslukerfinu séu sjálfvirkir plötufrystar sem þróaðir hafa verið á síðustu árum.