Á annað hundrað strandveiðibátar á veiðum

Vel á annað hundrað strandveiðibátar héldu á sjó í dag, á fyrsta degi strandveiðitímabilsins, samkvæmt áætlun stjórnstöðvar Landhelgisgæslunnar. Heildarfjöldi skipa á Íslandsmiðum um hádegisbilið var um 340 en þegar erlend skip og ýmis línu- og togskip hafa verið verið dregin frá má gera ráð fyrir að hátt í 150 strandveiðibátar hafi verið á sjó. Þeir voru nærri tvö hundruð þegar mest lét í morgun.

Í tilkynningu frá stjórnstöðinni kemur fram að sóknin hafi verið einna mest við norðvestanvert landið, frá Vestfjörum og út af Ströndum, allt til Eyjafjarðar. Þá hafa allmargir bátar verið að veiðum út af sunnanverðum Austfjörðum og Hornafirði. Leiðindaveður suðvestanlands þýðir að færri bátar hafa verið þar að veiðum.

Stjórnstöð Landhelgisgæslunnar fylgist grannt með sókn strandveiðibáta næstu vikur og mánuði. Þá mun Landhelgisgæslan sinna virku eftirliti af sjó og úr lofti allt strandveiðitímabilið.

• Blogga um frétt