Seiði hrognkelsa flutt út fyrir 400 milljónir króna

Frá Stofnfiski í Höfnum er áætlað að flytja út til Færeyja um tvær milljónir hrognkelsaseiða í ár og frá eldisstöð Hafró við Grindavík fara 150-200 þúsund seiði.

Verðmæti þessa útflutnings gæti verið um 400 milljónir króna. Hrognkelsin hafa dugað vel við að éta lús af laxi í eldi, en laxalús er víða vandamál í eldi.

Þá flytur Stofnfiskur einnig nokkuð af smáseiðum og hrognum hrognkelsa til Skotlands og Hjaltlandseyja, að því er fram kemur í umfjöllun um seiðarækt þessa í Morgunblaðinu í dag.