„Gríðarlegt högg“ fyrir Akranes
Setja bókamerki
„Þetta er gríðarlegt högg fyrir bæinn. Ég myndi áætla að þarna væru undir 150 störf ef tekin eru með afleiddu störfin.“ Þetta segir Vilhjálmur Birgisson, formaður Verkalýðsfélags Akraness, í samtali við mbl.is, í kjölfar ákvörðunar HB Granda um að segja upp 86 starfsmönnum þar í bæ.
„Þeir eru að hætta botnfiskvinnslu á Akranesi eftir að hún hefur verið í bænum í rúmlega hundrað ár. Það getur ekki verið nema á einn veg, það er virkilega sorglegt.“
Vilhjálmur segir það augljóst að viðræður HB Granda við Akranesbæ um að bæta hafnarsvæðið hafi ekki haft áhrif.
„Þeir segjast vonast til að geta fundið öllum starfsmönnum störf og þau eru að stórum hluta í Reykjavík. Það er einfaldlega þannig að þetta eru að langmestu leyti konur í fiskvinnslunni sem eiga börn í leikskóla og skóla, þannig það verður erfitt fyrir þær að taka slíku boði, miðað við það sem ég heyrði frá starfsmönnum í dag,“ segir Vilhjálmur.
„Þarna bætast við tveir klukkutímar á vinnudaginn, ef starfsmenn eiga að sækja vinnu til Reykjavíkur. Ég verð að segja alveg eins og er, að þegar fiskvinnslukona er búin að standa við færibandið í átta klukkutíma, þá er dálítið mikið að bæta tveimur tímum til viðbótar í ferðir fram og til baka. Þetta sögðu þær mér í dag.“
„En þetta er niðurstaðan og veruleikinn sem blasir við, það er ekkert öðruvísi.“
Segir nýtt frumvarp gefa eldisfyrirtækjum auðlindir
Mest spennandi kosningar í áratugi
Íslendingar ein mest einmana þjóð heims
Fara ekki lengur fram á einangrun yfir Davíð
„Mér finnst Halla Hrund svona Vigdísarleg“
„Þetta er pínu óvanaleg staða“
Bifreið ekið á skrifstofu Útlendingastofnunar
Katrín: Jóhönnustjórnin talaði máli Íslands