Skipstjóri fær frest til að kynna sér gögn

Búið er að fresta máli skipstjóra sem ákærður er fyrir að hafa framið almannahættubrot og stórfelld eignaspjöll með því að hafa togað með toghlerum og rækjutrolli þvert yfir rafstreng í Arnarfirði á Vestfjörðum. Málið verður næst tekið fyrir 6. september.

Málið var þingfest í morgun og að sögn saksóknara hjá embætti héraðssaksóknara var skipstjóranum kynnt ákæran auk rannsóknargagna. Fékk hann hins vegar frest til þess að kynna sér gögn málsins og ráðfæra sig við verjanda sinn. Afstaða hans gagnvart sakargiftum liggur því ekki fyrir. 

mbl.is greindi frá því á mánudag að héraðssaksóknari hefði ákært manninn vegna atviksins, sem átti sér stað í nóvember 2014. Rafstrengurinn slitnaði og skemmdist með þeim afleiðingum að rafmagn fór af fjarskiptamastri á Laugabólsfjalli. Lá öll fjarskiptaþjónusta niðri á svæðinu. 

Frétt af mbl.is

Skipstjóri sleit rafstreng á veiðum

• Blogga um frétt