Jómfrúarferð Jóns Kjartanssonar á laugardag

Áhöfnin á Jóni Kjartanssyni, nýju skipi Eskju á Eskifirði, býr sig nú til brottfarar en skipið heldur í jómfrúarferð sína á laugardag. Grétar Rögnvarsson skipstjóri segir mikla tilhlökkun enda mikill munur á aðbúnaðinum í þessu skipi og því gamla sem skipið leysir af hólmi, gamla Jóni Kjartanssyni.

Í landi búa Eskju-menn sig undir að keyra makrílvinnsluna í gang í fyrsta skipti í nýju húsi en nýtt uppsjávarvinnsluhús var tekið í notkun í nóvember á síðasta ári. Aðalsteinn Jónsson, hitt skip Eskju, fór í vikunni og sótti lítið magn af makríl svo prófa mætti búnaðinn áður en makrílvertíðin hefst af fullum krafti eftir helgi. Þó að þetta sé fyrsta makrílvertíðin með nýju vinnsluna er hún síður en svo ónotuð enda hefur þar farið fram síldar- og loðnuvinnsla.

Grétar segir að stefnt sé að koma í land á þriðjudag. Stefnan verður sett á að sækja makrílinn út af Eskifirði, en Víkingur var til að hífa einhver 200 tonn af makríl í Reyðafjarðardýpi í vikunni svo hann kvaðst bjartsýnn á að það tækist. 

Skipið var keypt frá Skotlandi en byggt árið 2003 í Noregi. Það er 70,7 metrar á lengd og 14,5 metrar á breidd. Aðalvél skipsins er MAK 6000 kw og 8160 hestöfl.

• Blogga um frétt