Engey RE heldur loks til veiða

Nýr togari HB Granda, Engey RE, kom inn til löndunar í Reykjavík í gær eftir stuttan prufutúr með þrettán í áhöfn og sjö tæknimenn. Um 20 tonn voru veidd af karfa til þess að reyna vinnslu- og karaflutningakerfið.

Engey kom til landsins frá Tyrklandi, þar sem skipið var smíðað, hinn 25. janúar síðastliðinn en hefur legið í Akraneshöfn síðan. Að sögn Vilhjálms hefur forritun og uppsetning rafkerfa í skipinu reynst mun viðameira verkefni en áætlað var. Skipið er háþróaður ísfisktogari, liðlega 55 metra langur og sá fyrsti af þremur sem HB Grandi lét smíða fyrir sig. Allur búnaður um borð er hinn fullkomnasti og brúin hlaðin tækjum sem eiga að auðvelda veiðar.

„Það hefur tekið mun lengri tíma en okkur óraði fyrir að samhæfa vinnslu- og karaflutningakerfi í Engey,“ segir Vilhjálmur Vilhjálmsson, forstjóri fyrirtækisins, en kerfið hannaði, þróaði og smíðaði fyrirtækið Skaginn 3X á Akranesi og á Ísafirði og er það hið fyrsta sinnar tegundar.