Lengir strandveiðar um tvo daga

Sjávarútvegs- og landbúnaðarráðherra Þorgerður Katrín Gunnarsdóttir hefur í dag ákveðið að auka við aflaheimildir til strandveiða um 560 tonn og verða strandveiðiheimildir því 9.760 tonn á þessari vertíð.

Greint er frá ákvörðuninni á vef sjávarútvegsráðuneytisins og kemur þar fram að með þessu sé verið að bregðast við áskorun stjórnar Landssambands smábátaeigenda sem var send ráðuneytinu í byrjun ágúst. Þar var skorað á ráðherra að auka aflaviðmiðun þannig að ekki kæmi til stöðvunar veiða.

Örn Pálsson, framkvæmdastjóri Landssambands smábátaeigenda.

Frétt af mbl.is

Vilja auka aflaheimildir í strandveiðum

Örn Pálsson, framkvæmdastjóri Landssambands smábátaeigenda, er ánægður með ákvörðunina. „Við erum sáttir. Það sem af er ágúst hafa 420 bátar verið við veiðar á hverjum degi að meðaltali,“ segir Örn og bætir við að þetta sé líka viðurkenning á mikilvægi strandveiðanna.

„Að sjálfsögðu vilja menn alltaf meira en það hefur ekki gengið vel að fá svona breytingar fram svo ég er mjög sáttur við þetta,“ segir Örn.

Í tilkynningunni frá ráðuneytinu kemur fram að með ákvörðuninni sé ekki aukið við áður ákveðnar heildaraflaheimildir heldur sé um tilflutning að ræða frá þeim þáttum sem 5,3 prósent er ráðstafað til, sem er m.a. línuívilnun og byggðakvóti.

Heimildirnar skiptast hlutfallslega jafnt milli strandveiðisvæða m.t.t. dagsafla hvers svæðis og er reiknað með að þessi viðbót auki sókn um tvo daga á hverju svæði um sig.

Aukningin skiptist þannig á svæði: svæði A 250 tonn, svæði B 120 tonn, svæði C 140 tonn, svæði D 50 tonn

• Blogga um frétt