Ferskir þorskhnakkar á brott með Norrænu

Vinnsla er hafin í fiskvinnslustöð Síldarvinnslunnar á Seyðisfirði að loknu sumarleyfi. Ísfisktogarinn Gullver NS landaði á mánudag fullfermi, 107 tonnum, og af því fóru um 55 tonn til vinnslu í stöðinni. Þar er nú unninn þorskur og ufsi og munu ferskir þorskhnakkar fara á brott með ferjunni Norrænu á morgun.

Þetta kemur fram á vef Síldarvinnslunnar. Að sögn Adolfs Guðmundssonar, rekstrarstjóra hennar, var unnið að viðhaldi, málað og snurfusað meðan á sumarleyfinu stóð.

„Fiskvinnslustöðin er nú orðin býsna glæsileg því verið er að leggja lokahönd á umfangsmiklar endurbætur á húsinu. Húsið hefur meðal annars verið klætt utan og er útlit þess orðið til fyrirmyndar,“ segir þar enn fremur.

Um fjörutíu manns starfa í fiskvinnslustöðinni en ekki hafa allir hafið störf að nýju. Starfsfólkið er sagt munu tínast inn fram í næstu viku og þá eigi framleiðslan að komast á fullan skrið.

• Blogga um frétt