Veiddu 73 þúsund tonn í júlí

Fiskafli íslenskra skipa í júlí var 73.473 tonn, eða 3% meira en í júlí 2016. Botnfiskaflinn nam tæpum 30 þúsund tonnum og jókst um 6%, en þar af veiddust tæp 17 þúsund tonn af þorski sem er 22% aukning samanborið við júlí 2016.

Þetta kemur fram í tilkynningu frá Hagstofunni. Segir þar að afli uppsjávartegunda hafi numið tæpum 39 þúsund tonnum í júlí og dregist saman um 2% samanborið við sama mánuð í fyrra.

Af uppsjávartegundum veiddist mest af makríl eða rúm 28 þúsund tonn.

„Flatfiskaflinn var tæp 3.200 tonn og jókst um 35% á milli ára. Af flatfisktegundum veiddist mest af grálúðu í júlí eða rúm 2.300 tonn. Skel- og krabbadýraafli var 1.632 tonn samanborið við 1.238 tonn í júlí 2016,“ segir í tilkynningunni.

Heildarafli á 12 mánaða tímabili frá ágúst 2016 til júlí 2017 var þá 1.120 þúsund tonn, sem er 8% meira en yfir sama tímabil ári fyrr.

Verðmæti afla í júlí, metið á föstu verðlagi, var 6,3% meira en í júlí 2016.

• Blogga um frétt