Smíði Viðeyjar RE miðar vel

„Þessu miðar ágætlega hjá okkur og við erum að miða við að skipið verði komið heim fyrir jól. Það er að styttast í prufukeyrslu á vélbúnaði og verður ljósavélum startað í vikunni.“ Þetta segir Þórarinn Sigurbjörnsson, skipaeftirlitsmaður HB Granda, á vef Granda í dag.

Þórarinn er staddur í Céliktrans-skipasmíðastöðinni í Tyrklandi þar sem nú er unnið að smíði og frágangi á ísfisktogaranum Viðey RE, sem er sá síðasti í röðinni af þremur nýjum ísfisktogurum sem Céliktrans  er að smíða fyrir HB Granda.

Tveir togaranna, Engey RE og Akurey AK, eru komnir heim. 

Að sögn Þórarins er nú unnið við innréttingar og rafmagnsvinnu í íbúðum um borð í Viðey og gengur sú vinna ágætlega. Þá er byrjað að innrétta brúna og verið er að ganga frá kælitækjum í lest.

„Það er svo stefnt á að farið verði í reynslusiglinguna í fyrstu vikunni í nóvember en skipið á að vera komið til Reykjavíkur fyrir jól,“ segir Þórarinn.

• Blogga um frétt