Tíðarfarið tefur afgreiðslu

Hvert skipið á fætur öðru kemur þessa dagana til Neskaupstaðar til að lesta frystar afurðir en að sögn Heimis Ásgeirssonar, yfirverkstjóra í frystigeymslum Síldarvinnslunnar, hefur tíðarfarið undanfarna daga tafið afgreiðslu skipanna en mikilvægt er að losna við afurðirnar svo nægilegt rými sé í geymslunum. Þetta kemur fram í frétt á vef Síldarvinnslunnar

Tvö skip liggja við festar á Norðfirði um þessar mundir en haft er eftir Heimi að skipin muni samtals lesta sex til sjö þúsund tonn og að mikilvægt sé að losna við afurðirnar svo nægilegt rými sé í geymslunum fyrir framleiðslu fiskiðjuversins og þeirra vinnsluskipa sem landa í Neskaupstað. 

Jafnframt er haft eftir Heimi að mikið hafi rignt síðustu daga og að það hafi tafið verulega fyrir. „Hins vegar gerum við okkur vonir um að það stytti upp þegar líður á daginn og þurrt verði að mestu næstu dagana. Við verðum að láta hendur standa fram úr ermum því auk skipanna er vinnsluskipið Hákon EA að landa 650 tonnum af frystri síld í dag,“ er haft eftir Heimi.

• Blogga um frétt