HB Grandi kaupir hlut í fiskþurrkun

HB Grandi mun ganga til samninga við eigendur Háteigs, fiskþurrkunar, um kaup á þriðjungs hlut í félaginu fyrir 450 milljónir króna.

Þetta kemur fram í tilkynningu frá útgerðinni.

Skinney Þinganes og Nesfiskur eiga nú félagið til helminga hvort en félögin munu eftir kaupin eiga þriðjung hvert.

Háteigur er eitt af þeim fyrirtækjum Suðurnesja sem byggja starfsemi sína á samnýtingu auðlinda, það er jarðvarma. Þyrpingin ber nafnið Auðlindagarðurinn og var stofnuð árið 2008.

Um er að ræða einu frumkvöðlaþyrpinguna sem vitað er um að hafi byggst upp í kringum jarðvarma. Markmið Auðlindagarðsins er „Samfélag án sóunar“ þannig að nýttir séu allir auðlindastraumar sem streyma inn í og frá fyrirtækjum garðsins til fulls og á sem ábyrgastan hátt.

• Blogga um frétt