Gjaldtaka taki mið af umhverfisþáttum

Faxaflóahöfnum verður framvegis heimilað að láta gjaldtöku taka mið af umhverfissjónarmiðum, orkunýtni eða kolefnisnýtni í siglingum. Alþingi samþykkti í síðustu viku breytingar á hafnalögum þess efnis. Er nú unnið að því að veita restinni af höfnum í opinberri eigu sömu heimildir.

„Með breytingunum er opnað á umhverfismiðaða gjaldtöku sem hefur rutt sér til rúms í Evrópu. Í dag eru einungis skemmtiferðaskip metin samkvæmt þessum alþjóðlegu vísitölum en þegar fram líða stundir gætu flutningaskip bæst við. Með þessu verður til fjárhagslegt hvatakerfi til umhverfisvænni og sjálfbærari skipareksturs. Afslættir eða álögur af þessu tagi skulu samkvæmt breyttum lögum vera gagnsæjar, hlutlægar og án mismunar og samræmast samkeppnislögum,“ segir í tilkynningu á vef stjórnarráðsins.

Þá segir einnig að við breytinguna hafi verið skylda hafna innan samevrópska flutninganetsins að eiga samráð við notendur um gjaldtökustefnu og „veita upplýsingar um umtalverðar breytingar á gjaldtöku minnst tveimur mánuðum áður en breytingar taka gildi. Samhliða þessu er ráðherra falið gefa út reglugerð sem tilgreini hvaða hafnir tilheyri samevrópska flutningsnetinu hverju sinni og um veitingu hafnarþjónustu, gagnsæi í fjármálum og sjálfstæði hafna.“

Innviðaráðuneytið mun hefja innleiðingu reglugerð Evrópuþingsins og -ráðsins 2017/352 er snýr að ramma um veitingu hafnarþjónustu og um sameiginlegar reglur um gagnsæi í fjármálum fyrir hafnir. „Nær sú gerð til allra hafna innan samevrópska flutninganetsins. Fimm íslenskar hafnir eru nú hluti af flutninganetinu: Sundahöfn, Seyðisfjarðarhöfn, Fjarðarbyggðahafnir, Vestmannaeyjahöfn og Landeyjahöfn.“

• 1 blogg um fréttina

Bloggað um fréttina

• Geir Ágústsson: Siglingaþjóð grýtir eigin höfn (því aðrir gera það, nema kannski …