300 tóku þátt í Klausturskeppninni

Ein fjölmennasta íþróttakeppni og stærsta akstursíþróttakeppni sem haldin er hérlendis, Klausturskeppnin svokallaða, var haldin við Kirkjubæjarklaustur um hvítasunnuhelgina. Vélhjólaíþróttaklúbburinn stendur að keppninni ásamt landeigendum á jörðinni Ásgarði.

Keppnin sem fyrst var haldin árið 2001 laðaði að sér rúmlega 300 keppendur þetta árið og tókst fádæma vel. Keppnin er svokölluð þolaksturskeppni þar sem keppendur keyra í 6 klukkutíma frá 12 á hádegi til kl. 18 einir, í tveggja eða þriggja manna liðum. Svæðið sem keppt var á var mjög fjölbreytt og bauð upp á frábær tilþrif. Veðrið lék hreinlega við keppnishaldara og keppendur, góður raki í brautinni, nánast logn, sól og blíða.

Á síðasta ári var keppnin blásin af vegna eldgossins í Grímsvötnum, í þetta sinn var þó enga ösku að sjá og aðstæður allar eins og best var á kosið. Þrátt fyrir mikinn fjölda keppenda og sex tíma langa keppni varð ekkert einasta óhapp á meðan á keppninni stóð sem þykir tíðindum sæta í keppni sem þessari.

 Þolakstur á mótorhjólum er langt frá því að vera auðveld, þó svo skemmtunin sé lykilatriði flestra þátttakenda. Brautin liggur um gróna hóla og sandfláka og bæði fjölbreytt og gríðarlega erfið. Sandhlutinn grefst mikið þegar líður á keppnina og keppendur þurfa að glíma við djúpar holur og hóla undir lok keppninnar en slíkt tekur mjög mikið á líkamann.

Keppt var í nokkrum flokkum s.s. einstaklingsflokki, en sigurvegarinn þar fær sæmdarheitið „Járnkarlinn“ að keppni lokinni, enda gríðarleg þolraun að keppa einn í 6 tíma í keppni sem þessari.

Heildarsigurvegarar keppninnar voru voru þeir Bjarki Sigurðsson og Eyþór Reynisson sem sýndu fádæma góðan akstur og kláruðu samtals 18 hringi á rúmum 6 tímum. Í kvennaflokki voru það Signý Stefánsdóttir og Bryndís Einarsdóttir sem báru sigur úr býtum en þær voru jafnframt í 18. sæti í heildina sem er fádæma góður árangur.

Sigurvegarar í öllum flokkum voru sem hér segir:

90+ heldri menn
1. Ragnar Ingi Stefánsson og Reynir Jónsson
2. Kristján Steingrímsson og Stefán Gunnarsson
3. Steingrímur Leifsson og Þorvarður Björgúlfsson

Afkvæmaflokkur – feðgar og feðgin
1. Hrafnkell Sigtryggsson og Helgi Már Hrafnkelsson
2. Ólafur Þór Gíslason og Gísli Þór Ólafsson
3. Baldvin Þór Gunnarsson og Gunnar Valur Eyþórsson

Kvennaflokkur – sigurvegarar kvenna urðu 18. sæti í heildina
1. Signý Stefánsdóttir og Bryndís Einarsdóttir
2. Gréta María Kristinsdóttir og Anita Hauksdóttir
3. Sigþóra Brynja Kristjánsdóttir og Einey Ösp Gunnarsdóttir

Þrímenningur – þrír í liði
1. Heiðar Grétarsson, Geir Guðlaugsson og Sigurbjörn Sigurbjörnsson
2. Atli Már Magnússon, Michael B. David og Víðir Ingi Ívarsson
3. Magnús Þór Sveinsson, Grétar Jóhannesson og Þorvaldur Ásgeirsson

Járnkallar – keyra einir allan tímann
1. Ármann Örn Sigursteinsson
2. Jónas Stefánsson
3. Reynir Hrafn Stefánsson
7. Birgir Már Georgsson

Tvímenningur og heildarsigurvegarar keppninnar
1. Bjarki Sigurðsson og Eyþór Reynisson
2. Hjálmar og Björgvin Jónssynir
3. Garðar Atli Jóhannsson og Sölvi Borgar Sveinsson

 Markmið Vélhjólaíþróttaklúbbsins með Klausturskeppninni er að halda skemmtilega og krefjandi keppni sem er þó  við allra hæfi og laðar að bæði keppendur og aðstandendur þeirra, og búa til sannkallaða fjölskylduskemmtun. Það er ennfremur mikilvægt markmið að skipulag  og umgengni á svæðinu öllu verði til fyrirmyndar. Áhersla er sömuleiðis lögð á gott samstarf við landeigendur og aðra samstarfsaðila á svæðinu, segir í fréttatilkynningu.

mbl.is