Þýski bílsmiðurinn BMW ætlar að halda áfram dísilvéla en fyrirtækið telur að þær muni áfram gegna mikilvægu hlutverki í bílasamgöngum. Munu vélarnar uppfylla alla ströngustu mengunarstaðla heims, þar á meðal Euro 6.
Frá þessu skýrði Harald Krüger, stjórnarformaður BMW, á ráðstefnu þýska innanríkisráðuneytisins um framtíð dísils sem orkugjafa.
„Okkur er fullkomlega ljóst að sjálfbærni er mikilvæg bílasamgöngum framtíðarinnar. Á því sviði stendur BMW í fremstu röð. Við vorum fyrsti bílaframleiðandinn í Þýskalandi sem einsetti sér að þróa til fulls rafmagntæknina sem orkugjafa í bílum og höfum sett á markað fleiri slíka bíla en nokkur annar stór bílaframleiðandi í heiminum. Hins vegar er rafmagnið alls ekki eina græna lausnin. Fullkomnari og háþróaðri dísilvélar munu einnig gegna mikilvægu hlutverki í þróun sjálfbærra bílasamganga. Þegar litið er til baráttunnar gegn loftslagsbreytingum verður jafnframt að horfa til þess hvaða árangur hefur náðst í þróun dísilvéla. Þegar horft er til ýmissa efna sem bílvélar losa og eru skaðleg umhverfinu kemur í ljós að bestu dísilvélarnar losa jafn lítið eða jafnvel minna af skaðlegum efnum en nýju bensínvélarnar. Þetta á sérstaklega við um smáagnir, kolvetni og kolsýring. Þessi efni eru nú orðin svo lítil í útblæstri dísilvéla að þær hafa ekki lengur neikvæð áhrif á loftgæði. Af þessum ástæðum leggur BMW ríka áherslu á hreinskipta og opna umræðu sem grundvallist á staðreyndum og vísindalegum rannsóknum áður en teknar verði afdrifaríkar ákvarðanir,“ sagði Krüger.
Hann staðhæfði til dæmis, að dísilvélar BMW Group losuðu nú þegar að meðaltali um 40% minna af nituroxíði en dísilvélar annarra bílaframleiðenda í Þýskalandi. Það hafi umhverfisstofnun Þýskalands staðfest í apríl sl. Sagði hann vélar BMW uppfylla nú þegar bæði staðla Euro 5 og 6.
Krüger hélt því og fram, að að umræðan um endalok dísilvélarinnar hafi stórskaðað umræður um umhverfisvernd og komið óverðskulduðu óorði á bestu dísiltæknina auk þess að skapa óöryggi meðal milljóna eigenda bíla með dísilvél. „Bestu dísilvélarnar byggja á mjög þróaðri tækni og eru mjög hreinar með tilliti til losunar. Við höfum alla tíð lagt áherslu á að tækni BMW Group við þróun véla með tilliti til útblásturs sé allt annars eðlis en annarra bílaframleiðenda. Við höfnum þar að auki gjörsamlega öllum dylgjum þess efnis að í bílum BMW sé að finna ólöglegan búnað í útblásturskerfi þeirra.“