Heath Ledger látinn
Ástralski leikarinn Heath Ledger fannst látinn í íbúð í Sohohverfi á Manhattan í New York í dag. Ledger var 28 ára gamall og var árið 2005 tilnefndur til Óskarsverðlauna fyrir leik sinn í kvikmyndinni Brokeback Mountain.
Kona sem starfaði við þrif í íbúðinni kom að leikaranum og var hann úrskurðaður látinn eftir að björgunarmenn komu á staðinn. Fréttastofan AP hefur eftir lögreglu að andlát Ledger tengist hugsanlega lyfjanotkun en tölfur munu hafa fundist við líkið. Að sögn blaðsins New York Times á leikkonan Mary-Kate Olsen íbúðina sem Ledger fannst í.
Heath Ledger flutti frá Ástralíu til Hollywood þegar hann var 19 ára og hann fékk fljótlega hlutverk í myndinni sem Mel Gibson leikstýrði og lék aðalhlutverkið í. Ledger lék síðan meðal annars í kvikmyndunum Monster's Ball og A Knights Tale og hann hafði tekið að sér hlutverk í kvikmyndinni The Dark Knight, sem er framhald kvikmyndarinnar Batman Begins
Ledger kynntist eiginkonu sinni, leikkonunni Michelle Williams árið 2005 við tökur á myndinni Brokeback Mountain. Þau eignuðust dótturina Matildu, en skildu á síðasta ári.
