Hallfríður J. Ragnheiðardóttir hlaut í dag Ljóðstaf Jóns úr Vör fyrir ljóð sitt Triptych í árlegri ljóðasamkeppni lista- og menningarráðs Kópavogs. Hallfríður er ellefti handhafi verðlaunanna en tilgangur samkeppninnar er að efla og vekja áhuga á íslenskri ljóðlist. 

Verðlaunaafhendingin fór fram við hátíðlega athöfn í Salnum nú síðdegis á fæðingardegi Jóns úr Vör, 21. janúar. Á sama tíma voru úrslit kynnt í ljóðasamkeppni grunnskóla Kópavogs. Þau sem urðu í þremur efstu sætunum eru Katrín Kemp úr Vatnsendaskóla fyrir ljóðið Vetrarkvöld, Hrönn Kristey Atladóttir úr Hörðuvallaskóla fyrir ljóðið Skógarljóð og Ólafur Örn Ploder úr Álfhólsskóla fyrir ljóðið Bolti. 

Ljóð sem óx við hvern lestur

Um 350 ljóð bárust í samkeppnina Ljóðstafur Jóns úr Vör undir dulnefni og vissi dómnefnd því ekki hver var höfundur fyrr en sigurljóðið hafði verið valið. Í rökstuðningi dómnefndar segir meðal annars að ljóðið sé ort af öryggi og krafti og ásamt tilvísunum sé það borið upp af sterku myndmáli og markvissri uppbyggingu.

„Þetta var ljóð sem dómnefndin kom að aftur og aftur, það óx við hvern lestur,“ segir m.a. í rökstuðningnum. Ragnheiður hlaut peningaverðlaun og Ljóðstaf Jóns úr Vör, áletraðan með nafni sínu, til varðveislu í eitt ár. Auk þess hlaut hún eignargrip sem Sigmar Maríusson gullsmiður hannaði. Þrettán grunnskólabörn fengu bókaverðlaun fyrir ljóð sín í grunnskólakeppninni en yfir sextíu ljóð bárust frá sex skólum í Kópavogi.

Grunnskólakeppnin verður árleg

Guðrún Pálsdóttir bæjarstjóri afhenti verðlaunin og Hafsteinn Karlsson, formaður menningar- og þróunarráðs, ávarpaði gesti, og fór yfir sögu keppninnar sem kennd er við skáldið Jón úr Vör og markmið hennar. Þá sagði hann stefnt að því að grunnskólakeppnin yrði árleg hér eftir.

Dómnefnd í ár skipuðu Gerður Kristný, ljóðskáld og rithöfundur, Jón Yngvi Jóhannsson bókmenntafræðingur og Sigurður Pálsson, ljóðskáld og rithöfundur. 

Eftirfarandi grunnskólabörn fengu viðurkenningu í grunnskólakeppninni:

Anna Margrét, Vatnsendaskóla
Steingrímur Bersi, Vatnsendaskóla
Fanney Einarsdóttir, Lindaskóla
Selma M. Gísladóttir, Hörðuvallaskóla
Róbert Atli Svavarsson, Lindaskóla
Baldvin Snær, Vatnsendaskóla
Anna Margrét Soussounis, Hörðuvallaskóla
Katrín Þóra Hermannsdóttir, Kársnesskóla
Lilja Lind Helgadóttir, Kársnesskóla
Líney Ragna Ólafsdóttir, Salaskóla