Seinasta vika hefur verið frekar slæm fyrir rapparann Iggy Azalea þar sem Steve Hirsch, eigandi klámmyndafyrirtækisins Vivid Entertainment, kvaðst ætla að gefa út kynlífsmyndband á næstu dögum sem sýnir Azalea. Þá komst hún einnig upp á kant við fyrrverandi kærastann sinn í vikunni sem reyndir nú að græða á óútgefinni tónlist hennar.
Maurice Williams, fyrrverandi kærasti Azalea, tilkynnti nýverið að hann ætlaði að gefa út smáskífu með tónlist sem Azalea gerði þegar hún var yngri. Þessu er greint frá á The Hollywood Reporter. Azalea hefur nú kært Williams fyrir að hafa tekið afrit af tölvugögnum hennar í leyfisleysi og fyrir að falsa undirskrift hennar.
Azalea og Williams kynntust árið 2008. Þau voru par þar til Azalea komst að því að Williams var giftur og átti börn.