Oscar de la Renta látinn

Bandaríski tískuhönnuðurinn Oscar de la Renta er látinn, 82 ára að aldri. Hann greindist með krabbamein árið 2006 en ekki hefur verið upplýst hvert banamein hans var. De La Renta var einn þekktasti tískuhönnuður Bandaríkjanna en hann sá meðal annars um að klæða fyrrverandi forsetafrúr Bandaríkjanna, þær Jackie Kennedy og Hillary Clinton.

De La Renta hannaði meðal annars brúðarkjól Amal Clooney nú fyrir skömmu er hún gekk að eiga eiginmann sinn, George Clooney, eins og frægt er, í Feneyjum í síðasta mánuði.

Oscar de la Renta fæddist í Dóminíska lýðveldinu árið 1932. Hann fór að heiman átján ára gamall, til Madríd á Spáni, til þess að læra myndlist. En hann var fljótur að skipta um starfsvettvang og hóf samstarf með spænska hönnuðinum Cristobal Balenciaga.

De la Renta lést á heimili sínu í Connecticut og í tilkynningu frá stjúpdóttur hans, Elizu Reed Bolen, og eiginmanni hennar, Alex Bolen, var hann umvafinn fjölskyldu og hundum sínum á dánarbeðnum.