Eftir að ásakanir á hendur Bill Cosby um kynferðisbrot komu fyrst fram hafa nokkrir einstaklingar stigið fram og sagt sögu sína. Núna síðast var það 90 ára gamall fyrrverandi starfsmaður NBC-sjónvarsstöðvarinnar, hann kveðst hafa grunlaus aðstoðað Cosby við að greiða mútur á þeim árum sem þátturinn The Cosby Show var framleiddur.
Maðurinn sem um ræðir heitir Frank Scotti, hann starfaði á NBC á sama tíma og leikarinn Bill Cosby naut mikilla vinsælda í sjónvarpinu. Scotti segist hafa aðstoðað Cosby við að greiða átta konum mútur á þessu tímabili. Múturnar voru greiddar til að þagga niður í konunum sem Cosby misnotaði að sögn Scotti. Einhverjar konur fengu allt að 250.000 krónur í einni greiðslu. Þessu greindi Scotti frá í viðtali við New York Daily News.
„Hann lék á alla, engan hefði grunað,“ sagði Scotti sem ákvað að stíga fram með sína sögu vegna þess að hann finnur til með þeim konum sem urðu fyrir barðinu á Cosby. Scotti er handviss um að Cosby hafi sent þessum konum pening í hverjum mánuði til að þagga niður í þeim. „Af hverju ætti hann annars að vera að senda þeim pening,“ sagði Scotti sem var alltaf beðinn að setja sitt nafn á ávísanirnar sem konurnar fengu. „Hann var í feluleik, ég áttaði mig á því seinna.“
Lögmaður Cosbys segir skjólstæðing sinn saklausan og telur Scotti vera að stíga fram með þessar ásakanir til að fá sína 15 mínútna frægð.