Suðurafríski grínistinn Trevor Noah mun taka við sem arftaki bandaríska grínistans og samfélagsrýnisins Jons Stewarts sem stjórnandi þáttarins vinsæla Daily Show á stöðinni Comedy Central.
Noah er þekktur grínisti í heimalandi sínu.
Hann hóf störf sem aðstoðarmaður Stewarts í Daily Show í desembermánuði síðastliðnum. Hann sagði við New York Times í dag að ákvörðunin hefði komið sér mjög á óvart.
Stewart tilkynnti í febrúar að hann hygðist láta af störfum sem stjórnandi þáttarins. Hann hefur verið umsjónarmaður hans frá því í byrjun árs 1999, en þá hafði þátturinn verið í loftinu í rúmlega tvö og hálft ár.
Stewart sagðist vera hæstánægður með ráðningu Noahs. Hann væri afar fær grínisti sem væri gott að vinna með.
Frétt mbl.is: Svo miklu meira en spaugari