Niall Horan, einn meðlimur One Direction, greindi frá því á Twitter í gær að hljómsveit hans væri nú byrjuð að vinna að hljómplötu númer fimm.
Það hefur gengið á ýmsu síðan einn meðlimur hljómsveitarinnar, Zayn Malik, hætti í bandinu í seinustu viku en hljómsveitin er greinilega hvergi nærri hætt. „Settist niður á fund með útgáfufyrirtækinu, við vorum að skipuleggja okkur fyrir næstu plötu. Get ekki beðið,“ skrifaði Horan meðal annars.
Malik greindi frá því á föstudaginn að hljómsveitin myndi halda ótrauð áfram þrátt fyrir að hann væri hættur. „Hljómsveitin hefur stutt við bakið á mér. Þeir hafa verið almennilegir í sambandi við þetta. Og þeir skilja að þetta passar ekki við mig lengur,“ útskýrði Malik. „Ég held að þeir verði ágætir,“ sagði Malik í viðtali við The Sun.