Vegfarendur á Rauðarárstíg ráku upp stór augu þegar riddari birtist þar skyndilega í dag. Var riddarinn klæddur í brynju og með hjálm og á hestbaki, en óvenjulegt er að sjá slíka fjórfætlinga á þessum stað, hvað þá þegar þeir bera brynjaða kappa á baki.
Ekki er ljóst hver var þarna nákvæmlega á ferð, en samkvæmt upplýsingum mbl.is var talið líklegt, af skósveini riddarans að dæma, að um væri að ræða einhverskonar atriði í steggjun.
Eins og myndin sýnir er þó ekki annað hægt að segja en að vel hafi verið vandað til verka, enda riddarinn í forlátri hringabrynju og með skjöld til að verja sig gegn yfirvofandi hættum.