Nokkur hópur fólks hefur nú skráð sig til þátttöku í íslenska leynijólasveininum en um er að ræða leik þar sem þátttakendum er úthlutað leynivini og skipst er á jólagjöfum. Er þetta í annað sinn sem leikur þessi er haldinn og hafa nú yfir 60 skráð sig til þátttöku.
Leikir sem þessir eru þekktir innan vinahópa eða á vinnustöðum og er leikurinn nú aðgengilegur öllum þeim sem vilja taka þátt, en hægt er að skrá sig til leiks hér.
Fram kemur í tilkynningu frá aðstandendum leynijólasveinsins að þátttaka sé án endurgjalds. Þurfa því þeir sem vilja gleðja aðra einungis að greiða fyrir þá gjöf sem þeir gefa, en ekki er sett hámark á það hversu dýrar gjafir má gefa.
„Þetta er í annað sinn á Íslandi sem Leynijólasveinninn er aðgengilegur öllum sem vilja taka þátt, en leikurinn var einnig haldinn í fyrra með góðum árangri. Í ár er stefnt að því að auka fjölda þátttakenda umtalsvert og þannig bæta við jólapakkaflóruna undir trjám landsmanna,“ segir í tilkynningu, en ekki þarf að hafa áhyggjur af því að einhver annar gefi dýrari gjöf en maður sjálfur - markmið leiksins er að taka þátt og gleðja aðra.