Næstkomandi laugardagskvöld fer fyrri undankeppni Söngvakeppni Sjónvarpsins fram í Háskólabíói. Áhorfendur hafa úr sex lögum að velja í hvorri undankeppninni og næstu tvær vikur mun mbl.is gefa lesendum sínum örlítið nánari innsýn í fólkið að baki hverju og einu lagi enda er mikilvægt að vanda valið þegar þjóðaríþróttin Eurovision er annars vegar.
Gréta Salóme Stefánsdóttir er höfundur og flytjandi lagsins „Raddirnar“. Hún tók þátt í Eurovision fyrir Íslands hönd í Baku árið 2012 ásamt Jóni Jósepi Snæbjörnssyni og fluttu þau lag Grétu „Never Forget“.
Því þótti mbl.is ekki úr vegi að spyrja hvort Gréta myndi gera eitthvað öðruvísi í ár, yrði hún valin til að standa á stóra sviðinu í Stokkhólmi.
„Annað lag, annað ár, ég myndi örugglega gera þetta allt öðruvísi,“ sagði Gréta og hló. „En maður lærir mikið af því að gera þetta einu sinni og tekur reynsluna með sér, klárlega.“
Hún segir það að vinna lag upp úr engu og vita af því að 200 milljónir manna munu hlusta á það í Eurovision vera magnaða tilfinningu.
Þrjú lög komast áfram úr hvorri undankeppni auk þess sem dómnefnd hefur möguleika á að hleypa sjöunda laginu áfram, telji hún það eiga sérstakt erindi í úrslit. Fylgist áfram með á mbl.is þar sem öllum keppendum verða gerð skil á næstu dögum.