Næstkomandi laugardagskvöld fer seinni undankeppni Söngvakeppni Sjónvarpsins fram í Háskólabíói. Sex lög taka þátt í keppninni líkt og fyrra kvöldið. Næstu vikuna mun mbl.is gefa lesendum sínum örlítið nánari innsýn í fólkið að baki hverju og einu lagi enda er mikilvægt að vanda valið þegar þjóðaríþróttin Eurovision er annars vegar.
Lagið „Raddirnar“ eftir Gretu Salóme Stefánsdóttur er nú þegar komið í úrslit Söngvakeppninnar en hún á að auki annan hest að veðja á; lagið „Á ný“ sem hún samdi en Elísabet Ormslev flytur.
Greta segir íslenskan texta lagsins fjalla um missi og söknuð. „Hún var sú fyrsta sem mér datt í hug,“ segir hún um valið á söngkonu fyrir lagið sem hún segir hafa verið auðvelt ferli. „Við erum búnar að þekkjast síðan við vorum pínulitlar, ólumst upp saman í tónlistarnámi.“
Greta er góðkunningi Eurovision eftir að hafa keppt fyrir Íslands hönd árið 2012 en Elísabet á einnig tengingu við keppnina þar sem móðir hennar er engin önnur en Helga Möller sem flutti fyrsta Eurovision-framlag Íslendinga, „Gleðibankann“, ásamt þeim Pálma Gunnarssyni og Eiríki Haukssyni fyrir sléttum 30 árum.
„(Það er) skemmtilegt að þetta lendi akkúrat á afmælinu, 30 árum sem sagt eftir að hún fór. Og hún er mjög spennt, ég held að hún sé spenntari en ég,“ segir Elísabet.
Þrjú lög komast áfram úr hvorri undankeppni auk þess sem dómnefnd hefur möguleika á að hleypa sjöunda laginu áfram, telji hún það eiga sérstakt erindi í úrslit. Fylgist áfram með á mbl.is þar sem öllum keppendum verða gerð skil.