Breska rokkhljómsveitin Muse hefur boðað komu sína til Íslands sumarið 2016 og
mun halda tónleika í Laugardalshöll laugardaginn 6. ágúst.
Þetta er ekki í fyrsta sinn sem hljómsveitin sækir Ísland heim en Muse hélt tónleika í Reykjavík árið 2003 í kjölfar útgáfu plötunnar Absolution, sem er þriðja skífa sveitarinnar.
„Síðan þá hefur mikið vatn runnið til sjávar og Muse hefur á þessum 12 árum og 6.
hljómplötum síðar orðið eitt stærsta nafnið í tónlistarheiminum. Allar götur síðan 2004 hafa piltarnir í MUSE verið áhugasamir um að koma aftur til Íslands. Vegna gríðarlegra vinsælda hljómsveitarinnar á heimsvísu hefur ekki verið hægt að koma því við fyrr en nú,“ segir í tilkynningu frá skipuleggjendum.
Tónleikarnir fara fram í nýju Laugardalshöllinni þann 6. ágúst en miðasala hefst þriðjudaginn 8. mars.
Einungis verður um eina tónleika að ræða. Tilkynnt verður um fyrirkomulag miðasölunnar nk. þriðjudag.