„Ég er hörkuspenntur fyrir Radiohead,“ segir tónlistarmaðurinn Ólafur Arnalds í samtali við mbl.is, skömmu fyrir tónleika Radiohead í Laugardalshölinni á Secret Solstice-tónlistarhátíðinni í kvöld.
Ólafur sá Radiohead í síðustu viku í Barcelona og vonast því eftir því að hljómsveitin spili ekki nákvæmlega sömu lögin í kvöld og þar. „Ég væri til í að sjá sem mest af In Rainbows-plötunnni, það er uppáhaldsplatan mín og þeir tóku lítið af henni síðast.“
Ólafur var heppinn að vera á landinu um helgina, þar sem mikið er um að vera hjá honum þessa dagana. Aðspurður um hvað hann ætli sér að sjá um helgina segir hann: „Ég er spenntur fyrir íslensku sveitinni Halleluwah.“