Leikarinn Dennis Quaid átti við mikinn fíkniefnavanda að etja á sínum yngri árum, en hann segist hafa verið farinn að óttast um líf sitt.
„Þetta byrjaði skemmtilega, síðan varð þetta skemmtun í bland við vandræði, og að lokum varð þetta bara til vandræða,“ sagði leikarinn í viðtali við tímaritið Radio Times.
„Ég fékk hugljómun og sá að ég myndi deyja, eða í það minnsta tapa öllu sem ég hefði áorkað, næði ég ekki að hætta. Ég fór því í 28 daga meðferð og gerði allt sem mér var sagt að gera.“
„Ég gat hætt að drekka og reykja gras, en kókaín var eins og púki á öxlinni á mér sem var sífellt að kalla á mig.“
Quaid náði síðan að lokum að sigrast á fíkn sinni á tíunda áratugnum, eins og fram kemur í frétt Daily Mail.