Ástarlífið virðist blómstra hjá frumburði Beckham-hjónanna því nú berast fréttir af því að Brooklyn Beckham og Sofia Richie séu byrjuð saman. Þau sáust saman í Lundúnum um helgina og virtust vera mjög hamingjusöm.
Beckham er búsettur í Bretlandi en Richie býr í borg englanna, Los Angeles, í Kaliforníu. Fyrir þá sem ekki þekkja Sofiu Richie þá er hún dóttir Lionel Richie og starfar sem fyrirsæta.
Í haust sagði mbl.is frá því að Brooklyn Beckham hefði slitið sambandi sínu við Chloë Grace Moretz.
Skötuhjúin höfðu verið par í nokkra mánuði, en þau eru voru einnig orðuð við hvort annað árið 2014.
Beckham eyddi síðasta sumri í Los Angeles, þar sem Moretz býr, en þau höfðu verið óaðskiljanleg síðustu mánuði.
Nú velta menn og konur því fyrir sér hvort Beckham hafi hnotið um Richie síðasta sumar þegar hann dvaldi í Los Angeles. Þegar stórt er spurt er fátt um svör.