Bjó til heimsins dýrasta taco

Rækjur, kavíar, trufflur og gullflögur eru ekki meðal hefðbundinna innihaldsefna í mexíkóskri taco-hveitiköku. Kokkurinn Juan Licerio Alcala hefur þó nýtt þessi hráefni til að búa til heimsins dýrasta taco. Verðmiðinn er aðeins 25.000 dollarar, eða rúmlega 2,7 milljónir króna, en taco er venjulega ódýr réttur í hveitiköku sem fá má hjá götusölum.

Enginn hefur enn pantað réttinn, sem Licerio er með á matseðlinum á veitingastaðnum Grand Velas Los Cabos á lúxusdvalarleyfisstaðnum í Baja í Kaliforníu. Licerio sagði AFP-fréttastofunni þó að málið snerist um að hugsa út fyrir kassann.

„Fólk verður spennt og hissa að frétta að það geti pantað taco fyrir 25.000 dollara, þegar það er vant að finna réttinn á 10 pesóa hjá næsta götusala,“ sagði hann.

„Síðan útskýri ég hnossgætið, tæknina og samhljóminn sem lyftir bragðlaukunum og gerir þetta þess virði.“

Við gerð réttarins notar Licerio taco hveitiköku sem er stráð með 24 karata gullflögum og fyllir hana með kobe-nautakjöti, belúga-kavíar, rækju og brie-osti með svörtum trufflum.

• Blogga um frétt