Veröld/Fólk | mbl | 25.3.2017 | 13:00

Músíktilraunir í Hörpu

Mynd 1 af 8 Fimmmenningarnir í Five Wolves in The Forest eru á aldrinum 16 til 17 ára, stunda nám í Mentaskólanum í Reykjavík og Menntaskólanum við Hamrahlíð og eru öll í sama tónlistarskólanum. Kristín Sesselja Einarsdóttir leikur á gítar og syngur, Finnur Harry Tomasson leikur á bassa og syngur bakrödd. Heba Sólveig Heimisdóttir leikur á rafmagnsgítar og syngur bakrödd, Hávar Þorbjörnsson leikur á trommur og Freyr Hlynsson leikur á píanó.

Skagafélagarnir Kristján Alexander Friðriksson söngvari, Sigurbjörn Kári Friðriksson gítarleikari, Elvar Jónsson bassaleikari og Guðbergur Jens …

Mynd 2 af 8 Skagafélagarnir Kristján Alexander Friðriksson söngvari, Sigurbjörn Kári Friðriksson gítarleikari, Elvar Jónsson bassaleikari og Guðbergur Jens Haraldsson trommuleikari, segjast fjórir gulir og glaðir skagagaurar sem dreymi ekkert stærra en að blómstra sem frábærir tónlistarmenn. Kristján er 22 ára, Sigurbjörn 21, Elvar 23 og Guðbergur 25 ára.

Mynd 3 af 8 Helgi Freyr Tómasson kallar sig Hewkii og spilar á gítar, hljómborð og tölvur. Hann hefur verið qð fást við tónsmíðar frá unga aldri og hefur spreytt sig á ýmsum tónlistarstefnum, housetónlist, trancetónlist, framsækinni rokktónlist, ambient og metaltónlist svo eitthvað sé nefnt. Um þessar mundir glímir hann við psychedelic trancetónlist og psybient. Honum til aðstoðar á tilraununum verður Ólafur Kári Ólafsson sem leikur á bassa og tölvur. Þeir eru báðír átján ára.

Mynd 4 af 8 Kvintettinn Módest GRÚV er ættaður frá Vatnsenda skipaður þeim Gabríel Erni Ólafssyni sem leikur á Rhodes og hljómborð, Daníel Oddssyni sem leikur á trommur, Dagur Þórarinsson spilar á rafmagnsgítar og Ásþór Bjarni Guðmundsson á rafbassa. Ari Ólafsson syngur. Þeir eru átján til nítján ára og stofnuðu sveitina með sameiginlega ást á minimalísku, gamaldags fönki að leiðarljósi.

Mynd 5 af 8 Ctrl Reykvíkingarnir Bjarni Benediktsson og Una Sóley Sævarsdóttir byrjuðu að spila saman fyrir hálfur ári og hafa verið iðin við lagasmíðar og æfingar síðan. Bjarni, sem er 21 rás, syngur og spilar á gítar, en Unnur, sem er 22 ára, sýslar með fartölvu og hljóðsmala og syngur bakraddir. Þau kalla sig Birth Ctrl og lýsa tónlistinni sem blöndu af melódísku synthpoppi saman við kaldhæðna en hreinskilna texta og sækja mikinn innblástur í 90s alt rokk, DIY elektróník og hiphop.

Mynd 6 af 8 Tvíeykið Phlegm skipa Flemming Viðar Valmundsson, sem leikur á bassa og syngur, og Ögmundur Kárason, sem leikur á trommur og syngur líka. Flemming er 21 árs, en Ögmundur tvítugur. Þeri segjast tveir vitleysingar af höfuðborgarsvæðinu sem ætli sér að baka vandræði. „Þetta er það sem gerist þegar rythmalúðar reyna að vera hardcore. Spilum sándtrökk fyrir mómentið þegar löggan blikkar ljósunum fyrir aftan þig og þú ert í engri stöðu til að tala við hana. Ögmundur Kárason þrusar á plastskinn og Flemming Viðar Valmundsson þykist vera reiður og strýkur þykka strengi.“

Mynd 7 af 8 Red Gingseng er tríó úr Reykjavík skipað þeim Ísidór Jökli Bjarnasyni trommuleikara, Ými Gíslasyni gítarleikara og söngvara og Eysteini Aron Halldórssyni bassaleikara. Þeir eru allir átján ára og líkja sjálfum sér við náttúrulyfið rautt ginseng sem sé mjög gott gegn streitu, þreytu, afkastarýrnun og einbeitingarskorti.

Mynd 8 af 8 Hafnfirska þríeykið Styrmir Gunnarsson, Selma Kröyer og Dagný Margrét Gunnarsdóttir kalla sig Vegan klíkuna. Strymir, sem er 23 ára, er rappari en Selma, sem er 24 ára, og Dagný, sem er 21 árs, rappettur. Þau segja Vegan klíkuna byltingarkennt rappapparat sem rappi um nýja tíma og fegurð alheimsinns. „Við vorum stofnuð uppúr rústum hljómsveitarinnar Stormur & Blíða. Vegan Klíkan eru frjáls meðlimasamtök fyrir hvern þann sem vill rappa með okkur (svo lengi sem hann sé vegan) og meðlmirnir eru hæfileg blanda af karlorku og kvenorku.“

Hljómsveitakeppnin Músíktilraunir hefst í Hörpu í kvöld kl. 19.30 og verður fram haldið næstu daga. Þetta er í 35. sinn sem keppnin er haldin. Að þessu sinni taka 33 hljómsveitir þátt í keppninni, en keppt er á fjórum kvöldum, í kvöld, sunnudagskvöld, mánudagskvöld og þriðjudagskvöld.

Tvær hljómsveitir komast í úrslit hvert kvöld, eina velja áheyrendur og eina velur sérstök dómnefnd. Úrslitin verða haldin laugardaginn 1. apríl.

Dómnefndin er skipuð undirrituðum, Árna Matthíassyni og þeim Grími Atlasyni, Gunnari Gunnarssyni, Hildi Guðnýju Þórhallsdóttur, Kristjáni Kristjánssyni og Ragnheiði Eiríksdóttur.

Hljómsveitirnar sem hreppa efstu sæti keppninnar hljóta ýmis verðlaun, en einnig eru hljóðfæraleikarar verðlaunaðir og viðurkenning veitt fyrir textagerð. Sigursveitin fær 20 hljóðverstíma í Sundlauginni ásamt hljóðmanni og gjafabréf frá Icelandair þar sem verður flogið til Evrópu og spilað á tónleikum, auk þess sem hún fær að spila á Iceland Airwaves-hátíðinni og á tónlistarhátíðinni Aldrei fór ég suður, 30 þúsund króna inneign frá vinyll.is, 20 þúsund króna úttekt frá 12 tónum og Styrk úr Minningarsjóði Péturs Kristjánssonar.

Sveitin í öðru sæti fær 20 hljóðverstíma í Hljóðheimum ásamt hljóðmanni og spilar á Iceland Airwaves-hátíðinni, 20 þúsund króna inneign frá vinyll.is og 15 þúsund króna úttekt frá 12 tónum.

Fyrir þriðja sæti fást 20 hljóðverstímar í Aldingarðinum ásamt hljóðmanni, 10 þúsund króna úttekt frá vinyll.is og 10 þúsund króna úttekt frá 12 tónum.

Áheyrendur velja Hljómsveit fólksins sem fær að launum upptökutæki frá Tónastöðinni, 20.000 kr. úttekt frá Smekkleysu, plötubúð, og að spila í beinni á Rás 2 í Popplandi.

Söngvari Músíktilrauna fær Shure Beta 58-hljóðnema frá Hljóðfærahúsinu, gítarleikari Músíktilrauna fær 30.000 kr. úttekt frá Tónastöðinni, bassaleikari Músíktilrauna fær 30.000 kr. úttekt frá Tónastöðinni, trommuleikari Músíktilrauna fær 30.000 kr. úttekt í Hljóðfærahúsinu, hljómborðsleikari Músíktilrauna fær 30.000 kr. úttekt frá Tónastöðinni og rafheili Músíktilrauna fær 30.000 kr. úttekt frá Tónastöðinni og mix og masteringu á þremur lögum frá Möller Records.

Blúsuðustu hljómsveit tilraunanna verður boðið að spila á Blúshátíð í Reykjavík sem fer fram 8.-13. apríl.

Forlagið veitir viðurkenningu fyrir bestu texta á íslensku, bókagjöf og ársáskrift að snara.is.

Fleira áhugavert

Áköf mótmæli í bandarískum háskólum

„Þetta náttúrulega endar með ósköpum“

Fara ekki lengur fram á einangrun yfir Davíð

„Mér finnst Halla Hrund svona Vigdísarleg“

Félagsstarf »

Stjörnuspá »

Hrútur

Nú gengur það ekki lengur að þú skjótir á frest að laga það sem aflaga hefur farið heima fyrir. Notaðu tækifærið og hrintu einhverju sem þú hefur á prjónunum fyrir sjálfan þig í framkvæmd.

síðasta vika