Walter Becker, annar stofnandi og gítarleikari bandarísku jazz-rokk hljómsveitarinnar Steely Dan er látinn, 67 ára að aldri. Frá þessu var greint í tilkynningu á vefsíðu hans. Ekki voru gefnar upplýsingar um hvernig andlátið hafi borið að.
Steely Dan var stofnuð árið 1972 af Becker og Donald Fagen. Hún hefur selt yfir 40 milljón platna í gegnum tíðina. Árið 1981 hætti sveitin en tók upp þráðinn að nýju árið 1993. Í júlí missti Becker af tónleikum sveitarinnar þar sem hann var að jafna sig af veikindum.