Aðstandendur kvikmyndar eftir bókinni Burial Rites, Náðarstund, sem er söguleg skáldsaga byggð á síðustu aftökunni sem fram fór á Íslandi, hafa nokkrum sinnum skoðað mögulega tökustaði fyrir myndina í Húnaþingi vestra. Þetta kemur fram á vef RÚV.
Samkvæmt heimildum RÚV hefur hópurinn m.a. skoðað tökustaði í Vatnsdalnum og Vatnsnesinu þar sem málið átti sér stað á sínum tíma.
Í gær sagði tímaritið Variety frá því að staðfest sé að Jennifer Lawrence, ein skærasta stjarna Hollywood um þessar mundir, muni fara með hlutverk Agnesar Magnúsdóttur í myndinni. Myndinni verður leikstýrt af Luca Guadagnino, sem hefur verið orðaður við Óskarsverðlaunin fyrir myndina Call Me by Your Name.
Burial Rites mun byggjast á samnefndri bók Hönnuh Kent frá 2013, þar sem fjallað er um örlög Agnesar sem var hálshöggvin 12. janúar 1830 í síðustu aftökunni á Íslandi. Mun söguþráður myndarinnar snúast um þann tíma er líður frá glæpnum og þar til dauðadómurinn er staðfestur, er Agnes myndar „tilfinningaleg og rómantísk tengsl“ og veltir fyrir sér glæpunum sem hún er sökuð um, samkvæmt Variety.