Kynlífsflokkurinn býður fram

Boðað hefur verið til þingkosninga í Ástralíu í ágúst og þar ætlar Kynlífsflokkurinn sér stóra hluti. Segist flokkurinn ætla að lífga upp á kosningabaráttuna svo um muni.

Fiona Patten, leiðtogi flokksins, kynnti stefnuskrá hans á bar í Melbourne í morgun og sagði þar að flokksmenn myndu láta hárið á Tony Abbott, leiðtoga stjórnarandstöðunnar, rísa og gera Juliu Gillard, forsætisráðherra, gráhærða.

„Við höfum alltaf sótt fram og viljum gjarnan láta til okkar taka," sagði Patten og gerði um leið gys að kosningaslagorðum hefðbundnu flokkanna.

Meðal stefnumála Kynlífsflokksins er að lögleiða líknardráp, leyfa fíkniefni til einkanota og afnema stranga klámlöggjöf Ástralíu. Patten sagðist gera sér góða von um að fá að minnsta kosti einn þingmann kjörinn í öldungadeild ástralska þingsins. 

Frambjóðandi Kynlífsflokksins í Sydney, þar sem Abbott er frambjóðandi, er gamanleikari sem hefur boðist til að heimsækja kjósendur íklæddur baðfötum einum saman. 

Patten bauð sig fram í aukakosningum í kjördæminu Higgins á síðasta ári og fékk þá 3% af greiddum atkvæðum.

• 1 blogg um fréttina

Bloggað um fréttina

• Haraldur Haraldsson: Kynlífsflokkurinn sækir fram/gæti gert skurk,eins og besti gerði hér á …