Galli í vökvastýri leiðir til þess að erfitt er að stýra bílunum. Reuters

Bílaframleiðandinn General Motors hefur tilkynnt að innkalla eigi 1.3 milljónir bíla frá fyrirtækinu í Bandaríkjunum, eftir að alríkisrannsókn sem fór fram í janúarmánuði leiddi til mögulegs galla í vökvastýri.

Bílarnir sem verða innkallaðir eru 2005-2010 árgerðirnar af Chevrolet Cobalt, 2007-2010 árgerðirnar af Pontiac G5s og samskonar gerðir bíla í Kanada og Mexíkó, að því er fram kemur í tilkynningu frá bílaframleiðandanum. Kvartanir hafa borist vegna galla í vökvastýri bílanna sem leiði til þess að erfitt sé að stýra þeim.

„Ítarleg rannsókn leiddi í ljós að þetta er vandi sem skapast yfir tíma og ber nokkuð á í eldri árgerðum bíla sem ekki eru lengur í ábyrgð,“ sagði varaforstjóri GM, Jamie Hresko. „Þess vegna teljum við rétt að kalla bílana inn svo viðskiptavinir okkar geti andað rólega.“

Bandaríska umferðareftirlitið efndi til rannsóknar á 905.000 bílum af gerðinni Chevrolet Cobalt fyrr á þessu ári eftir að því höfðu borist rúmlega 1.100 kvartanir frá neytendum, sem og fréttir af 14 árekstrum.