Fredrik Reinfeldt. forsætisráðherra Svía. mynd/norden.org

Danskir og sænskir stjórnmálaleiðtogar eru komnir í hár saman eftir að talsmenn dönsku stjórnarflokkanna lýstu þeirri skoðun, að Evrópuráðið þyrfti að senda kosningaeftirlitsmenn til Svíþjóðar vegna þingkosninganna sem þar fara fram síðar í september.

Ástæðan  er sú, að sænska sjónvarpsstöðin TV4 neitaði að sýna kosningaauglýsingu frá Sænsku demókrötunum, sem eru yst á hægrivæng sænskra stjórnmála. Þá hefur sænska ríkissjónvarpið ákveðið að leyfa talsmanni flokksins ekki að taka þátt í lokaumræðum stjórnmálaleiðtoganna fyrir kosningarnar. 

Michael Aastrup Jensen, talsmaður danska flokksins Venstre í utanríkismálum, sagði við Jyllands-Posten í gær, að hann ætlaði að taka málið upp á fundi Evrópuráðsins í október. Naser Khader, talsmaður Íhaldsflokksins í utanríkismálum, sagði að Svíar stunduðu ritskoðun og Pia Kjærsgaard, leiðtogi Danska þjóðarflokksins, sagði að staða þessara mála væri verri í Svíþjóð en í löndum í Austur-Evrópu.

Sænskir stjórnmálaleiðtogar taka þessari gagnrýni fálega. Á vef Berlingske Tidende í dag er haft eftir Fredrik Reinfeldt, forsætisráðherra Svía, að erfitt sé að skilja gagnrýni Dana. Hann segist ekki bera ábyrgð á ákvörðun TV4 og hafi ekki forsendur til að tjá sig um hana en næg tækifæri séu fyrir flokka og frambjóðendur að koma sínum sjónarmiðum á framfæri í kosningabaráttu.

Mona Salin, forsætisráðherraefni rauðgræna bandalagsins í Svíþjóð, segir að sænskar kosningar séu fullkomlega lýðræðislegar og hún sé stolt af því að til séu lönd, stjórnmálamenn og ríkisstjórnir, sem geti gert greinarmun á málfrelsi og hatri á tilteknum þjóðfélagshópum.