Erlent | mbl | 24.7.2011 | 18:48 | Uppfært 19:09

„Mamma Útey“ var skotin fyrst

Kona stendur á bryggjunni í landi og horfir til Úteyjar. Reuters

Monica Bøsei, 45 ára gömul kona sem stjórnaði starfseminni á Útey og var kölluð „mamma Útey“ var eitt fyrsta fórnarlamb ódæðismannsins Anders Behring Breivik í eynni á föstudaginn var.

Jens Stoltenberg nefndi nafn hennar í dag í minningarguðsþjónustu í Ósló og sagði að í hugum margra hafi hún verið sjálf Útey. Monica Bøsei leiddi starfið í eynni um langt árabil og sem slík starfaði hún mikið með lögreglunni.

Grunaði að ekki væri allt með felldu

Talið er að hana hafi grunað að ekki væri allt með felldu þegar hún hitti Breivik í lögreglubúningi. Grunurinn kostaði hana lífið en hún kann einnig að hafa komið í veg fyrir enn hörmulegri atburði en urðu.

Monica Bøsei var um borð í bátnum sem flutti Breivik út í eyna þar sem voru sumarbúðir AUF, ungmenna í Verkamannaflokknum. Um borð var einnig Håkon Sandbakken, 19 ára varaformaður AUF í Bærum. Hann greindi sjónvarpsstöðinni TV2 frá ferðinni og samtali þeirra Bøsei og Breivik.

„Hún talaði við gerandann og ræddi auðvitað það sem hafði gerst áður í Ósló. Það töluðu allir um það í bátnum,“ sagði Sandbakken í samtalinu við sjónvarpsstöðina. Maðurinn sem sigldi undir fölsku flaggi í einkennisbúningnum kunni auglóslega ekki að meta spurningar Bøsei.

Hrein og bein aftaka

Sandbakken sagði að Breivik hafi staðið teinréttur og gefið í skyn að hann vildi ekki spjalla og ekki tekið mjög fúslega þátt í samtalinu. Grunur vaknaði augljóslega hjá Bøsei því um leið og báturinn lagðist að fór hún beint upp í aðalhúsið.

Þar talaði hún við öryggisvörð sem hafði verið ráðinn til starfa, en hann var reyndur lögreglumaður. Breivik áttaði sig á þessu og dróg upp vopn. Það var hrein og bein aftaka þegar hann skaut þau Bøsei og öryggisvörðinn. Þau voru fyrstu fórnarlömb Breivik í Útey.

Monica Bøsei lætur eftir sig sambýlismann, Jon Olsen, og tvær dætur. Olsen varð vitni að því þegar konan hans var skotin. Skammt frá sat 16 ára dóttir þeirra með vinkonu sinni. Breivik skaut vinkonuna, en feðginin komust undan. Svo héldu drápin áfram.

Truflaði áform ódæðismannsins

Í húsinu þar sem Bøsei og öryggisvörðurinn voru myrt fannst sprengiefni. Margir sem TV2 ræddi við eru sannfærðir um að grunsemdir Bøsei gagnvart Breivik hafi komið í veg fyrir enn meiri hrylling.

Håkon Sandbakken sagði að Breivik hafi haft ástæðu til að taka sprengiefnið með sér út í eyna. Hann hafi verið búinn að gera áætlun, en eitthvað truflað hana. Ef ekki þá hefði hann sprengt efnið.

Viðtal TV2 við Håkon Sandbakken