Tíu manns eyðilögðu aðstöðu Sameinuðu þjóðanna á Gasaströndinni sem notuð er undir sumarbúðir fyrir börn um miðnætti í gær. Brenndu mennirnir fána SÞ og hluta af sviði. Árásin stöðvaði börnin þó ekki í að reyna við heimsmet í flugdrekaflugi í dag.
Talsmaður samtaka SÞ sem styðja palestínska flóttamenn fordæmir árásina og segir hana beinast gegn börnum Gasa og SÞ. Krafðist hann þess að yfirvöld á Gasa rannsökuðu málið og kæmu lögum yfir þá sem bæru ábyrgð á henni.
Þrátt fyrir árásina freistuðu börnin í sumarbúðunum þess að slá heimsmet í flugdrekaflugi. Reyndu þau að slá út met sem sett var í Kína í apríl þegar yfir tíu þúsund börn flugu flugdrekum sínum um loftið.
Í fyrra réðust vopnaðir og grímuklæddir menn tvisvar á sumarbúðirnar og kveiktu í tjöldum, stólum, borðum og fleiru lauslegu. Íslömskum öfgamönnum var kennt um þær árásir en þeir telja sumarbúðirnar táknrænar fyrir vestræn spillingaráhrif því að strákar og stelpur fá að blanda geði óhindrað þar.