Sérfræðingar skoða Fukushima kjarnorkuverið í maí. HO

Yfirvöld í Japan hafa farið fram á fleiri rannsóknir eftir að aukin geislun var uppgötvuð í hrísgrjónaplöntum sem höfðu verið ræktaðar nálægt kjarnorkuverinu í Fukushima. Kjarnorkuverið skemmdist í jarðskjálfta og flóðbylgju í byrjun ársins.

Geislavirk efni hafa þegar fundist í nautakjöti, mjólk, spínati og telaufum af svæðinu. Japanir hafa miklar áhyggjur af geislavirkum hrísgrjónum. En hrísgrjón eru undirstaðan í fæðu Japana og þeir rækta mest af þeim sjálfir.

Rannsókn sem var gerð á hrísgrjónum frá borginni Nihonmatsu, sem er um 60 kílómetra frá Fukushima-verinu, sýndi að plönturnar innihéldu 500 bekerel á hvert kílógramm af geislavirkum sesíum. Bekerel er algeng mælieining fyrir geislavirkni. Samkvæmt nýlegum reglugerðum í Japan eru hrísgrjón með upp undir 500 bekerel hvert kg álitin örugg til átu. Hrísgrjón frá yfir 400 stöðum í Fukushima hafa verið prófuð og hæsta stig af geislavirkni hingað til var um 150 bekerel á hvert kg. En vegna nýlegra mælinga hafa yfirvöld í Fukushima skipað svo fyrir að frekari rannsóknir verði gerðar á hrísgrjónum frá svæðinu.

Japönsk yfirvöld hafa verið gagnrýnd fyrir að hafa ekki gert nóg til að halda hættulegri geislavirkni fjarri matvælaframleiðslu og ógna þannig heilsu manna.

Í júlí fór geislavirkt kjöt af nautgripum frá Fukushima í búðir. Í kjölfarið var kjöt frá svæðinu tímabundið bannað í búðum og yfirvöld lofuðu að herða öryggisathuganir. Banninu var aflétt í sama mánuði.