Colosseum er eitt sögulegra minja Rómar. Reuters

Tyggjóklessum hefur verið sagt stríð á hendur í Rómarborg. Yfirvöld og sjálfboðaliðar hafa tekið höndum saman um að skrapa þessar ókræsilegu klessur af ómetanlegum minjum og fornum steingötum borgarinnar.

Hreinsunarátakið hófst í dag á Largo Argentina, sögulegu torgi þar sem standa rústir fjögurra rómverskra hofa. Hundruð tyggjóklessa voru skrapaðar af veggjum hofanna, torginu, gangstéttum og götum í kring.

„Á hverjum degi er um það bil 15.000 tyggjóklessum spýtt á göturnar, meira að segja á sögulegum minjareitum,“ segir Piergiorgio Benvenuti, yfirmaður sorphirðusviðs Rómarborgar sem annast átakið. „Það kostar borgina eina evru að fjarlægja hverja klessu.“

Sjálfboðaliðarnir sem taka þátt eru á vegum samtakanna „Noi Per Roma“, sem útleggst á íslensku „Við fyrir Róm“ en eiginkona borgarstjórans, Isabella Rauti, er formaður þeirra. Hún segir að fólk ætti að hugsa sig tvisvar um áður en það spýtir út úr sér tyggigúmmíi á götum úti, því það sé lengi að leysast upp.

Ferðamenn í Róm kvarta gjarnan undan því að borgin eilífa sé óhrein og hafa yfirvöld reynt að bregðast við því með öflugri sorphreinsun á ferðamannasvæðum.